Þetta er allt að koma!

Jæja, þá er ég búin að koma upp þessu fallega bleika bloggi þar sem ég ætla að reyna að blogga sem oftast á meðan ég er í Svíþjóð. Ef einhver heldur að ég ætli að blogga hérna mér til skemmtunar er það mikill misskilningur, þetta blogg þjónar aðeins þeim tilgangi að koma í veg fyrir það að mamma mín hringi í mig oft á dag til þess að spyrja hvort allt sé ekki í lagi. Í staðinn er ég búin að lofa henni að blogga eins oft og ég get sem ég ætla að reyna að standa við.

Annars byrjar ferðin vel strax (þótt ég fari ekki út fyrr en eftir tvo daga). Fékk símtal í gær frá Icelandair þar sem þeir sögðu mér að því miður hefði fluginu mínu verið aflýst (hérna stoppaði ég og hugsaði í sekúndubrot, ómægad ég kemst ekkert til Svíþjóðar og þarf að vinna aftur í IKEA í sumar) og þyrfti þess vegna að fljúga til Stokkhólms í staðinn og síðan frá Stokkhólmi til Gautaborgar. Frábærar fréttir fyrir flughrædda. Ég tók þessu nú samt öllu með ró en er orðin frekar stressuð núna þar sem ég hef ekki ennþá fengið miðann minn sem þau lofuðust til að senda mér.

Fyrir utan allt þetta er ég byrjuð að hugsa um hvað ég eigi nú að taka með mér, það erfiðasta er að velja hvaða skó ég vil taka með... jájá, ok, ég er kona, ég veit það, en þetta er mjög erfitt val. Hvað ef ég kaupi mér eitthvað úti sem passar einmitt við skó sem ég tók svo ekki með mér út? Það væri algjör disaster! Annars held ég að ég sé komin með allt það sem ég þarf til þess að lifa af í Svíþjóð:

Fake tan
Ljóst skol
Bleik föt
Best of Abba diskur
Basshunter plakat
Vindvél (a la Carola)
Munntóbak

Ég meina, maður verður nú allaveganna að reyna að falla inn í hópinn!